保華建築創辦人車炳榮喺九龍塘歌和老街五號嘅故居，再度易手，買家係住開新界獨立屋嘅廠家，佢農曆年期間去開九龍塘睇樓，俾呢間建築風格非常獨特嘅大屋吸引，後來知道間屋由已故著名建築師車炳榮興建，現任業主買入後並無重建，間屋裏裏外外保留車氏手筆，用料靚，內櫳寬敞，花園特大，空地多，足夠泊五架大車，於是慕名買入。
中原九龍豪宅高級區域聯席董事梁瑋麟話，歌和老街五號佔地四千六百幾呎，間屋面積約二千四百五十呎，成交價四千二百萬，呎價超過萬七，相當理想。原業主係從事皮革業務嘅董姓商人，九一年以約千三萬向車氏遺產持有人買入，十五年間升值兩倍幾。
梁瑋麟又話，區內屋地成交唔多，不過呎價硬淨，上次同類成交喺舊年底，由燈飾大王樊邦宏以九千萬售出施他佛道十二號屋，呎價接近萬六蚊。