搞活動最好就梗係多啲大人物捧場先夠熱鬧，最怕就係同人哋撞期，但係新年咁多春茗，又真係好難避免。好似噚晚咁，證券經紀業協會嘅春茗，就同中聯辦嘅酒會撞到正，唔少賓客一係就冇現身，一係急急腳兩頭騰！留足成晚嘅，只有主禮嘅港交所周文耀（圖一）、證監張灼華，同埋財經事務及庫務常秘何鑄明。
傳媒一早收到風，話日日趕幾場嘅馬時亨，會畀面到場打個招呼，但最終都無到，令唔少人撲空。而前幾日，喺立法會同任總互片嘅詹培忠，就最早到場，但只係放低張名片，話到明自己要去中聯辦嗰邊，前後唔夠一分鐘就走咗。
另一個早早到場嘅係中信泰富范鴻齡，佢一到場見到冇乜人，即刻話自己會唔會早咗啲，之後同協會主席艾秉禮寒暄咗幾句（圖二），留咗唔夠10分鐘就趕住走，咁趕去邊？咪又係中聯辦囉！
雖則有人冇到早走，之不過都有唔少有心人，好似姍姍來遲嘅小賭王何猷龍，佢係全場最尾一個到嘅賓客，其他人幾乎走晒，不過有心唔怕遲，點都好過冇到啦！
李潤芳攝