坦白講，小記好少去土瓜灣呢亭舊區搵食，一來成名舖一早試過，二來新店好少會揀呢區開業，就算開親都多數係家庭式小作業餐館，風味足但特色欠奉，偏偏開業兩個月的淞木村日本料理，揀正土瓜灣馬坑涌道開業，重愈嚟愈旺場！最引人注目係店舖面積居然大到有成6,000呎，大成咁，咪踢波都得？好，一於帶埋大班模特兒踩場開波，試吓走唔走到位先。
記者：羅灝汶
攝影：楊錦文
Model：AllfromSalvador
超抵價反彈
淞木村可以喺舊區逆市反彈絕對唔係奇迹，新派日本菜式，配上極大的餐廳環境，先天因素已經吸引唔少朋友專程到土瓜灣搵食，其次店內大部份食材都係由日本新鮮空運到港，例如北海道松葉蟹、象拔蚌、珍珠蠔、三文魚、鱆紅魚等等，但價格就非常化算，每人平均消費100蚊左右，負責人話價錢抵除咗吸引更多食客外，亦想回饋一下舊區捧場客，不過最終受惠梗係我哋呢班為食鬼啦。
坐足200人唔覺逼
全店裝潢以木色為主，除咗坐大廳感受熱鬧氣氛外，場內重有3間貴賓房，湊夠８個人就可以入房，全場坐成200人都唔覺逼，加上場內特設酒吧部，就算唔踢波唔食壽司，約埋幾個朋友落嚟齋飲酒都得。
極上刺身拼盤$250
挑選當日最新鮮嘅貨色，份量超大，足夠3-4人食，材料有海膽、三文魚、吞拿魚、帶子、甘蝦、鱆紅魚、劍魚腩等，大部份由日本新鮮到港，新鮮香甜。
甜酒煮三文魚$46
一睇就知係日式Fusion菜，三文魚用日本香草醃足大半日，夠入味，味道又香又濃，魚肉更加一啲都唔腥。
杯杯蠔$15/杯
外形的的骰骰勁Cutie，有3種味道揀，分別係鮮茄汁、芒果汁同日式汁，口味非常獨特，甜甜酸酸嘅汁，配合珍珠蠔及蘿蔔茸，好快成為店內新寵兒，重一度供不應求，要最近先返貨。
燈籠卷$54
總共有三種口味，綠色係芥末味魚子、黃色係柚子味魚子、橙色就係原味蟹子，推介先試食原味之後柚子味，最後才吃芥末味，就可以真正品嘗到燈籠卷的三種不同味道，內有新鮮炸成的天婦羅蝦，加上爽脆青瓜，非常滋味。
食客有say
淞木村日本料理（27621799）
地址：土瓜灣馬坑涌道2號C地下
營業時間：
一至五：11:30am-3:00pm
6:00pm-12:00mn
六及日：12:00nn-3:30pm
6:00pm-12:00mn
座位：約200人
