恒指變化唔大，暫時都係上吓落吓。東亞（023）今日盤數彈出，如果靚靚哋，則可帶來短期小陽春局面。東亞昨升15仙，滙控（005）又有進帳40仙，用春江鴨派理論分析，東亞張成績表相應屬於靚靚哋嗰便。
公司輪由上市公司發出，全港得28隻，每四十幾家公司只有1家發輪。備兌輪咁好炒（指易買賣，唔係易贏錢咁解），邊處有人咁神心去搞公司輪？
恩利公司輪117：太平洋恩利（1174）陰陰哋又上3格，收1.70元。禽流感對非禽類食品公司有利，恩利得益，公司又分拆1檔生意喺星洲掛牌，有錢落袋。1個月時間，股價升咗1/4，嫌急啲。見回吐，雞仔注買公司輪117，隻輪7月尾夠鐘，輪價27仙，負溢價1.8%，槓桿率6.3倍。睇數據，唔錯。
金朝陽公司輪2311：金朝陽（878）由1.93元彈上2元，公司輪2311由10仙飛上23仙。隻輪本月27日最後買賣，行使價2元，23仙上車即係成本2.23元，高過正股11.5%，你買埋我份。要博，都係博正股算數。
冠軍公司輪354：冠軍公司輪354續1仙求售，有6球易手。下周一最後買賣，行使價1.38元，正股（092）做緊1.29元。隻輪唔使作廢嘅機會，同跑馬射蚊鬚差唔多。
章盛