外圍市況反彈，港股噚日亦跟隨，不過升幅有限，去到15467就回頭，連15500都摸唔到。黑客話，禽流感陰影唔聲唔聲嚇你一驚，最近已蔓延至市區，愈來愈埋身，股市隨時會借此調整，投資者又點敢去得太盡呢？
領匯（823）靜咗一排後，近日再現強勢，噚日創16.95元新高。除咗瑞銀出報告唱好，話股價見20.28元之外，亦傳TCI入市再增持，目的是想奪得控制權。
如果TCI奪得控制權，雖然未必可以即時將領匯旗下商場資產拆骨出售，但至少可以迫領匯管理層做好領匯的業績，否則隨時會以大股東身份召開股東會終止有關信託合約，管理層為咗唔想被炒魷，當要落力做好盤數，加租減成本自然少不免。現時TCI持有領匯18.35%，而領匯股價已累升不少，但至今未見其減持獲利，可見相當有野心。
李兆基及恒發（097）近期頻頻出手增持中煤（003），再次惹起市場的注目，揣測中煤會否派特別股息或提高派息比率。中煤噚日升0.89%至16.90元，成交高達1.98億元。花旗唱好話會見19元，以噚日收市價計，尚有13.4%上升空間。
精熙定價有水位
精熙國際（2788）今日掛牌，公開發售獲得216倍超額認購，以2.20元定價。Cookie話，今次精熙招股，有唔少台資落大飛，聽講準備將隻股炒起，今日掛牌應該有睇頭。不過，阿虎有一個疑問，既然反應咁好，點解唔以上限2.35元定價呢？Cookie話，定價低少少可以畀水位讓捧場客賺錢。
今次精熙並無公布國際配售認購超額幾多倍，按傳統智慧來推算，該部份的認購反應可能唔太理想，又或者機構投資者持審慎態度，集中在2.20元水平入飛。
阿虎