舊年開始嘅加息潮，對居屋二手交投影響逐漸浮現，成交量反覆下挫，上個月只得四百六十六宗登記，比舊年十二月嘅四百八十一宗，微減三點一巴仙，但相對舊年五月高位嘅一千零五十九宗，就勁跌五成六，重創二十六個月新低。不過，總值五億三百幾萬，同舊年十二月差唔多，但比舊年五月就大減近五成四。
指標屋苑中，以鰂魚涌康山花園最慘情，全月得三宗登記，比舊年十二月嘅九宗，急跌近六成七。而一向交投最活躍嘅九龍灣麗晶花園，就以十四宗登記稱冠，較舊年十二月多兩成七。
至於舊年炒賣情況勁過麗晶嘅藍田康華苑，上個月都有八宗買賣登記，比舊年十二月嘅十一宗減三宗。利嘉閣周滿傑認為，美國加息周期重未完，所以估計第一季居屋二手買賣都係得個靜字，每月僅五百宗左右。