噚日無綫古裝街拍《鳳凰四重奏》，馮仁昭諗住去探吓班順便睇吓有乜嘢八吓，點知見到阿佘（佘詩曼），佢第一時間就話：「你遲咗啦！蝕晒，頭先康華話肚痛，去廁所突然間就暈咗喺條街度。」
馬德鐘冇同情心
馮仁昭即刻打畀康華問候佢，之後佢就喺廁所行出嚟，攬住個肚好痛苦咁話：「你哋點知㗎！頭先真係好痛，今朝都精神奕奕，飲完canteen杯橙汁，就覺得肚痛，開工一陣就頂唔順，要去廁所，馬德鐘重笑我要去廁所都唔使面都青晒，行到一半路就暈低，好彩俾個cameraman發現，成個人冇晒知覺，淨係聽到人講嘢，又郁唔到，我重聽到阿佘同我講笑話以為我死咗，有好多大佬喺出面等緊我，叫我起身。」
講到咁嚴重，馮仁昭問康華點解唔叫白車呀？康華話：「真係瘀到爆，工作人員有幫我call白車，但係我今日冇帶身份證，白車嚟到就走咗，去完廁所已經好好多，跟住去睇私家醫生，可以唔使身份證。」
