自由黨喺上年六月正式成立咗個扶貧基金，短短七個月間，已經處理咗六百九十二宗個案，真正受助個案則有一百五十八宗，大多數都係向低收入家庭提供緊急學費援助同書簿費等，涉及嘅款項多達四百三十幾萬，確係幫咗好多人。
就算早前茶果嶺木屋區大火，自由黨成員都專程去到災區，同啲受災學童做登記，仲喺新年前，向三十六位受影響學生發放每人一千蚊書簿費，等佢哋唔使因為大火燒屋而影響學業。
當自由黨好似政府二號咁，向受難人士發放援助之時，市民千祈唔好以為佢哋有求必應，基金成員之一嘅孫國林就話，佢哋絕對唔係黃大仙，唔好乜都搵佢哋，好似有個中年男人上過去攞錢，話要攞少少生活費，另外亦有人開宗明義想用啲錢嚟還債，呢啲原因，自由黨梗係唔會放水啦。主席田少話，佢哋會管好個基金，唔會俾人濫用。
傳真︰2623-9278
電郵︰[email protected]