終於都嚟到《FFVII》復活計劃嘅第四部曲，由幾個月前嘅CG電影《AdventChildren》賣過百萬隻打響聲勢後，緊接住有PSP及日本手機Game外傳推出，而最終章亦喺呢個禮拜登場。呢款《DirgeofCerberusFFVII》（下簡DOC）搞搞新意思，唔玩至強嘅RPG，轉而踩過Shooting界玩射槍！《FFVII》主角之一嘅槍王Vincent（雲遜）再次登場，重畀埋機槍你任掃㖭！
記者：許福合
唔少人見到呢款遊戲，第一個問題都會問《FF》係玩射擊咩？可見《FF》同RPG已經幾乎畫上等號，今次《DOC》上《FFVII》角色，其實連帶場景設計、動作到遊戲流程都有相似嘅感覺，當然以動作射擊為主，對玩家反應、技術自然都較高。
玩《FF》遊戲，除咗欣賞畫面，感受遊戲外，Fans對故事都相當執着，與一般遊戲唔同，《FF》故事設定會比較連貫緊密，新作《DOC》故事就設定於《FFVII》之後三年，各位有印象的話即係動畫版《AdventChildren》一年之後，世界又再進入混亂時代，呢個時候玩家就成為主角VincentValentine，進入亂世戰鬥。
手槍機槍任你射
一開始進入遊戲，慣例可以欣賞到多段高質動畫，遊戲主要以第三身視點為主，不過操作時略嫌轉換角度時速度較慢，變成感覺上角色反應不夠快，好多時敵人出現喺身旁而未察覺，起初玩時就經常被偷襲，好在好多時玩家都有夥伴在身邊，若然孤身一人就要小心觀察環境。既然今集改成動作射擊，主角武器都係槍械為主，而且種類選擇好多，於適當環境要選用合適武器應敵，喺《DOC》上，武器主要可分為三大類，近距離可用機關槍掃射，中程就可用手槍，還有可擔任狙擊手來福槍，可以喺遠方偷偷射殺敵人，轉換武器採用切換方式，隨時可按情況轉換，不用預先裝配，彈性比較高，同時更為考驗玩家判斷環境能力。
改咩槍自己話事
開始時武器選擇當然唔多，只有最基本簡單嘅手槍，屬最低級武力，打敵人都唔覺痛，之後更換武器提升戰力同時，亦可針對手頭上武器作出升級，例如手槍就可改槍管、槍托、瞄準器、彈藥及配件等，可針對玩家使用習慣調節，例如加裝瞄準器手槍，準繩度比較高，又或者對付一啲經常喺城巿出沒嘅四腳怪物，一般皮較厚，換槍管或火藥提升破壞力就比較實用。遊戲有時會出現特殊任務，呢類任務報酬唔錯，見到記得要接！值得一提《DirgeofCerberus》支援網上對戰，不過要接駁至日本PlayOnline玩，過程比較繁複，相信一般玩家未必用得着。
機迷意見
PROFILE
遊戲類型：動作射擊
對應主機：PS2
遊玩人數：1人
開發商：SQUAREENIX
行貨售價：$428
售賣點：DreamStore（25753285）
地址：灣仔東方188商場256號舖