財政司司長唐英年屬龍，狗年犯太歲，故凡事小心，最緊要趨吉避凶。今年佢就創新地揀咗二月二十二日宣讀預算案，仲係上午十一點幾讀，既取其222諧音，又是大吉之日，希望一切順利。八方唔係導人迷信，只係阿松當年教訓太深，因為佢不聽老人言，係要搵全年最差嗰日讀預算案，結果咪跟住一日就出事，仲提早下台囉。都唔好話唔信邪。
講番唐唐，佢一味腳頭好，一上場香港經濟就由沙士谷底走高，然後節節上升，大家都計到佢可以提前滅赤，唔會違反《基本法》，05-06年度嗰一百八十億財赤分分鐘都冇埋。
派糖大計只退不減
既然咁好勢頭，一百三十萬納稅人梗係想唐唐派糖，最好減稅，等大家一齊happy吓，煲呔咁想連任，肯定係派糖嘅最大得益人，所以必定支持。問題係唐唐使唔使為煲呔賣大包，替人作嫁衣裳？於是就有傳聞話唐唐想學沙士當年，一次過退稅就算數，咁做比起減稅簡單，否則經濟一差就好難加番，何況重有禽流感、美國利率等不明朗因素，政府收入隨時變，貿然減稅好大風險。至於點退法就未知，上次有最高上限三千大元，今次唔知會唔會按比例退，交得多就退得多。
八方站喺納稅人立場，梗係想減得就減，等啲中產可以有氣唞，始終還富於民好過藏富於政府，不過最後唐唐都可能唔減只退，拖得就拖，咁就辛苦晒稅務局局長劉麥懿明，因為如果要退稅，稅局又要做餐死，有排計數同寄支票。好彩今年啲市民交稅好爽手，好多人都一次過交晒兩期稅──唔係要做好市民，而係為咗攞信用卡積分，真係全世界都冇。稅局水浸，劉太有數交，做乜都開心啲。
至於銷售稅，唐唐一定會有料到，做唔做未必關佢事，反正係煲呔連任後嘅事，到時話唔定財政司已經換咗姓陳嘅，咪等佢拆彈囉。
傳真︰2623-9278
電郵︰[email protected]