金價跌一跌，前日重熱炒的金銀銅鐵股即刻好似食咗瀉藥，江西銅業（358）跌7.4％至4.675元；紫金礦業（2899）跌6.3％至4.825元，半新股靈寶黃金（3330）亦跌7.34％，收5.05元。
經紀黃話，𠵱家市場充斥對沖基金，佢哋做嘢經常去得好盡，有好消息時炒過龍，有壞消息時會質得過深，睇嚟大市稍後將出現過山車走勢，各位最好縛緊安全帶。
另外，小初昨日同班經紀打牙骹，話題之一，係估狗年首隻新股現代美容（919）今日嘅表現。
班經紀老友表示，好耐未見過一隻新股上市時有咁大爭議，尤其係連消委會都走出嚟咬住唔放，可算係經典場面。
經紀黃話，早期有唔少投資者睇好現代美容，皆因公司毛利率高、賺錢能力強。
不過，出現一連串負面消息後，唔少要咗貨嘅客仔如淋咗一大盆冷水，最慘係想抽飛已經抽唔切，因此今日掛牌表現唔慌靚。
慕容小初