八方噚日係警察隊員佐級協會新春團拜酒會撞到人事及訓練處處長曾偉雄，曾Sir賣花讚花香，話𠵱家唔少警員都有大學學位，警隊諗緊點樣培訓令佢哋更專業，例如培訓有七年或以上經驗嘅警員做談判專家、拆彈專家咁。曾Sir下個月就會飛去新西蘭考察呢個問題。
成個警隊有二萬七千人，由警員到一哥，分咗成十四級，曾Sir話今年會成立小組，檢討吓有冇必要增加或者減少一啲級別。至於請人方面，下個財政年度想請嘅一千二百五十一人，包括一千二百個警員、五十位督察，重有一個零丁嘅職位就係總督察。八方奇怪點解唔由內部晉升，原來警察有十幾個職務比較特別嘅總督察或者警司位，係專責做一啲好專門嘅特別工作，好似工程、培訓等，呢啲位內部冇人識做，一定要喺出面請人。至於嚟緊要請個咩嘢總督察？曾Sir就大賣關子，唔肯透露。
傳真︰2623-9278
電郵︰[email protected]