新正頭春茗特多之外，開新舖嘅消息都唔少，噚日鐘表界老前輩周湛煌間宜進利喺中環開新表行，叫做EECTimeZone，專賣中高價歐洲獨家品牌貨，為咗谷宣傳，重專登請咗幾個港、台名模做Show，加埋一眾傳媒，成千呎嘅舖頭都搞到人山人海，迫到不得了。
有幾迫？華華見到周老闆有個親友遲咗少少到，諗住打個招呼恭喜一下，但喺門口一見到咁多人，就即時嚇到掉頭走咗！
華華幾經辛苦迫到入去，梗要拉住周老闆傾幾句，佢話做生意好講意頭，所以一早擇好吉日先開張，又話已經打算半年內開多間分店，地點都係揀中環地舖，家吓重傾緊，之不過香港只係踏腳石，國內市場先係佢嘅目標。咁又係，家吓香港啲貴價名牌，都係招呼自由行同胞，如果有門路唔怕俾人呃，不如直接去上海北京搵銀咪重直接。
周湛煌間宜進利唔算好出名，但周家就唔嘢小，佢阿爺周少歧係前立法局議員，阿爸周竣年重勁，做立法局及行政局議員多年，曾經同八個港督共事，由30年代威到70年代。到周湛煌呢代，佢就醒喇，唔搞政治，一心做手表生意，得閒飲吓酒食吓嘢養吓馬，不知幾逍遙。
李華華