令到啲花店老闆、整餅師傅同珠寶店職員笑到見牙唔見眼嘅情人節又殺到，對一啲老夫老妻嚟講，都係冇乜好慶祝㗎喇，如果有心，真係日日都情人節，點使特登搞埋啲小動作𠱁身邊人咁無謂。
唔講唔知，田少老婆同肥龍一樣都係噚日生日，許仕仁生日人影唔見，田少一家就齊齊食飯慶祝，順便預祝埋情人節，真係一雞兩味。田少送畀老婆嘅禮物好特別，就係老婆鍾意乜就幫佢「埋單」，咁就唔使煩送乜畀佢。田太咁幸福，真係恨死隔籬。
好多立法會議員都有咁同感，鄺大狀一開口就話，情人節乜都特別貴，使乜咁無謂，都係唔好搞咁多嘢重好，鄺太聽到肯定嬲到噴火。由於二月十五日係鄺大狀牛一，同情人節好鬼近，一齊慶祝就算。
飲食界肥仔張重正，以情人節係星期二，從事教育工作嘅張太無暇，加上自己要開會為由，話明咁即係唔使慶祝，言下之意，又慳番一筆。咪以為肥仔張咁冷淡無情，佢記得初初識太太嗰時，見到佢本聖經好殘舊，特別買咗本新嘅畀佢，骨子裏查實好有心，只係把口唔肯講啫。
傳真︰2623-9278
電郵︰[email protected]