任賢齊一向喜歡刺激，他愛跑車與電單車，更愛參加越野比賽，珍藏品就離不開他的第一部超級跑車、限量古董電單車和越野電單車賽冠軍獎座。小齊○一年參加亞洲越野電單車錦標賽，雖然弄至損手爛腳，不過他認為辛苦得回來的冠軍寶座更彌足珍貴。除了愛刺激玩意，小齊亦有靜的一面，他收藏了刻上中文名字的結他和英國名師設計的藝術品。 採訪：胡比
首部超級跑車
「呢部瑪莎拉蒂跑車係我第一架超級跑車，二○○一年幫佢哋做代言人，佢哋送畀我嘅。我將佢放喺上海，雖然架車係送嘅，但係交稅都交咗八十萬，最慘係我唔可以成日揸架車，好似有一次諗住去上海做嘢就第一時間掂吓佢，點知撻極都唔着，原來架車冇晒電，後來我叫上海啲朋友得閒幫我揸吓架車，唔好等佢壞。」
越野比賽冠軍
「參加亞洲越野電單車錦標賽三次，每次都係進步一級，到○一年先攞到冠軍，每次參加呢個錦標賽都會搞到損手爛腳，所以係好辛苦攞番嚟，對我嚟講好難得，加上近年愈來愈忙，參加比賽機會就愈來愈少，所以都幾珍貴。」
限量古董鐵騎
「呢架電單車係一九六一年生產，當年全球限量一千六百部，𠵱家剩番五部，成個台灣就淨係得我呢部。我入行前識咗個好鍾意收藏電單車嘅人，佢知道我好鍾意呢部車，當時佢見架車都唔郁得，就轉讓畀我，後來我修理好，可以揸出街，不過我都唔捨得揸。」
英國藝術櫈仔
「係我第一次收藏嘅藝術品，設計師TomDickson好出名，喺大英博物館都有佢嘅展品。呢件本來係個uncle拍賣返嚟嘅，我去佢屋企見到，覺得好得意，咪幫uncle打工，咁佢就好平價咁讓畀我，跟住我就愛上收藏TomDickson嘅藝術品，𠵱家都差唔多收藏咗過百件。」
刻中文名結他
「原本我同間德國廠訂做，點知間廠搵台灣另一間廠生產，我想刻我嘅英文名上去，點知台灣間廠知道係我訂嘅，就私自幫我刻咗中文名。最初見到個結他寫住任賢齊三個字，我都有啲嬲㗎，不過睇睇吓覺得幾特別，好少人會咁搞笑刻自己個中文名喺支結他度嘛。」
