舊年代理行都賺大錢，慶功之餘，順便公布升職好消息，等一眾前線，可以有個目標與希望，努力開單，令公司盈利再上層樓。
美聯喺西九龍祝捷會上，公布擢升區域經理陳瑞香做西九龍高級區經，由於佢嘅努力，令到西九龍區可以喺大角嘴一號銀海，以及長沙灣碧海藍天嘅銷售戰中勝出，攞到全場總冠軍。佢話，今年目標係擴充分行增加人手，務求提高市場佔有率。
另外，世紀二十一上月做到三十五宗中半山豪宅買賣，淡市中創紀錄，加入三年半嘅曾慶豐，由營業董事升做執行董事，佢管轄八十人。世紀二十一豪宅區舊年營業額二千五百萬，佢今年大幅調高目標，要做五千萬數。
各大代理行都話要做多啲數，睇嚟，今年代理行之間嘅競爭，會比舊年更加激烈，希望唔會因為爭生意而犯規，俾地監局處罰。
電郵地址：[email protected]