呢排大學輪住搞新聞界新年團拜，為免被指一邊籌錢一邊派錢，大學派利是改為送無厘頭小禮物，中大送福袋，港大就送「五福臨門如意利是」，八方噚日去公開大學嘅團拜，校方將個桃駁梨包到靚一靚當禮物；校長梁智仁話，桃駁梨有學有成果、桃李滿門嘅意思。八方都覺得唔錯，起碼有得食。
另外，公大人文社會科學院署理院長閔德福話，《董浩雲的世界》作者之一、前特首董建華妹妹董建平，委託該學院將《董浩雲的世界》繙譯成英文版，預計明年出版。閔教授話，佢哋搵咗二十名繙譯學士課程嘅畢業生一齊做，肯定會譯得好好喎。佢又話，學院正繙譯鬼才黃霑喺港大讀書時嘅博士論文，佢嘅論文係講廣東歌文化，好多俗語，所以譯起嚟唔容易。
傳真︰2623-9278
電郵︰[email protected]