董建華時代嘅特首辦主任WK林煥光經過一年休養生息，終於重出江湖。WK行年只有五十四，退休實在太年輕，加上特區正係用人之際，只要佢老兄理順啲感情問題，分分鐘做完奧運馬術行政總裁，重有機會捲土重來，成為煲呔嘅新班底。有人最近喺沙田遇見過WK，佢同太太及家人一齊，心情甚佳，重話要封利是畀啲看更，多謝佢哋日夜關照。
WK工作能力不容置疑，當年已經係十分受重用，加上佢人緣好，又信佛，所以遴選委員會一收到佢嘅申請，都覺得不作他人想，因為始終呢份工要做好多同政府、北京以及馬會嘅聯絡工作，煥光做過民政局局長，肯定有優勢，唔識馬術反而次要咯。
AO短缺，忠誠難求，煲呔為搵人填位真係搞到頭都大埋，煥光個位固然要急急上馬，而且不容有失，所以速戰速決，同時駐京辦、駐上海辦、駐成都辦以及駐倫敦辦都要尋覓人選。
駐北京怕孭鍋
八方聽聞，班AO對於駐上海經貿辦事處嘅主任位興趣甚高，政府收到好多申請，真係爭崩頭，但係駐京辦就仍然少人問津。官場咁多叻仔叻女，邊有死錯人，駐上海肯定好玩又有前途，因為中國經濟起飛，第日唔撈都易啲搵老細；至於駐京始終係天子腳下，風險大好多，最怕孭黑鍋，當年梁寶榮捱義氣，一去冇得回頭，係人都驚啦。好彩，最後都有人選啦，相信遲吓就會公布。至於成都，聽講都唔係好多人想去，倫敦就始終有吸引力，林鄭月娥三月回歸，應該唔難搵人接班。
由港英至今，為咗扮民主，政府都唔可以迫啲官員外放海外，全部都係自願性質，好多AO升到咁上下，都有仔女讀書問題要面對，所以唔係話走就走，當然亦有人為咗陪太子放洋讀書，或者費事留在下亞厘畢道眼冤而自動請纓。
搞掂埋呢輪人事調動，煲呔就叠埋心水全力以赴去改善經濟民生，按目前形勢嚟睇，香港都好難有人可以挑戰到煲呔，陳太係唯一出身、經驗同民望可以同煲呔比拼嘅，但係如果中央又玩欽點，陳太要公開攞夠提名都唔易。所以話，煲呔唔使咁小器同眼淺，要做大事要有胸襟，否則邊得港人心悅誠服，大家當你係北京一條狗，就冇意思喇。
傳真︰2623-9278
電郵︰[email protected]