日股唔生性，日經指數大散448點，唔使問，四周圍股市都受到拖累。恒指跌143點，唔算傷。H指瀉186點，傷得多。
年頭到𠵱家，恒指升3.3%，而H指則大升17.9%，用前日指數計則更大升21.4%。有冇興趣喺H股方面造淡搵食？
中企P輪2298：H指大散，中企指數P輪生猛，如果認為H指仍然向下調整，中企P輪2298係正路之選。隻輪昨收13.1仙，升18%，7月尾夠鐘，溢價10%，槓桿率18.5倍（有效6.8倍），引伸波幅28.7%。呢隻輪，喺同類輪中交投最旺場，睇錯方向手起刀落了斷，唔使5秒鐘。
黃金C輪9698：隔晚紐約期金散19.50美元（3.4%），黃金C輪9698散17%。隻輪6月尾到期，輪價54仙，溢價2.8%，槓桿率6.6倍（有效5.5倍），引伸波幅26.5%。
認為金價會再升，買9698。問題係，金價喺上次聖誕節前，只係500美元多啲，𠵱家554.8美元，是否仍然過高？重有隻黃金C輪2271，呢隻博唔過。
黃金P輪2133：2133收14.6仙，升49%。隻輪6月尾到期，溢價11%，槓桿率48.8倍（有效10.7倍），引伸波幅24.2%。雖則槓桿率勁爆，但要畀咁嘅溢價，制唔過，除非認為金價幾十美金幾十美金咁跌。
另1隻黃金P輪9702，又係6月尾到期，溢價18.4%，又係冇得諗。
章盛