日股大跌，港股跌勢亦轉急，恒指收15373，跌143點，暫時守穩在上月中的低位水平。其實，大市今次升後調整，係意料中事，而今次升市主角的中資股，大多亦跟市回吐，好多散戶亦賺到心滿意足，紛紛獲利。不過，沽壓雖大，但一樣有大盤一路趁低吸納，睇大戶同基金嘅動向，個市應該未升完。
大市急跌，自然會有不利嘅消息配合而出，噚日又傳出有資金流走，資金流向對大市嘅升跌係有絕對嘅影響，問題係成為趨勢、抑或只係個別事件。家吓個市，除咗唔少一路睇淡嘅人外，就算一直有揸貨嘅投資者，在股價大幅上升幾成後，好多都已賺錢落袋，散戶現在持貨相信會係在一個較低嘅水平，而大部份貨源仍係集中在基金手上。基金市嘅特性，係間唔中就會震一次倉，食多一「浸」貨後，又會再升過。
中油（香港）（135）真係犀飛利，升完可以再升，噚日再升5仙，收2.725元，過年前話睇3元，相信好快可以達到目標。
哈爾濱動力（1133）升後調整，收6.75元，跌0.15元，成交1157萬股，大行同基金繼續食貨。哈動累積升幅雖大，但里昂重睇得好好，指佢05至07年的每股盈利複合增長率係57%，07年全年盈利可升到10.66億元人民幣，預測PE只係8倍，維持「買入」評級，目標價調高至8.20元。
H指雖然已創出8年多的新高，但好多中資股仍然大落後，好似深圳國際（152）股價只係上番04年4月嘅水平，唔好計97年中股價見過2.70元，就算同04年2月嘅高位0.44元比較，重係大落後30%。
短線阻力在0.32元
呢輪中資線來料好勁，中油同哈動嘅表現有目共睹，中糧（506）在大跌市亦能守穩4.40元，聽講好快會開車。中資來料噚日話要留意深國，繼上月發行可換股債券被搶購一空後，好快又會有大動作，聽聞係涉及注資同重組，唔排除係會增持深圳航空權益或入股鹽田港項目。
深國噚日逆市而升，收0.305元，短期阻力在0.32元，若見有大成交而升破，上升目標係0.38元。
郭兆誠