曾主持過兒童節目嘅過氣男歌手以前都叫紅過一排，但因為佢份人太麻煩，自視過高又怨言太多，所以搞到神憎鬼厭，星途滑落，佢亦脾氣日差，有段時間日日買醉，有次佢重醉酒炒車，撞完人哋唔單止冇歉意，重企喺馬路聲大大惡人先告狀，肉酸到不得了，真係自己攞架嚟丟！
息事寧人唔報警
話說嗰晚過氣男歌手蒲吧後，醉醺醺揸車去西貢，途中佢已經瞌眼瞓，揸車揸到亂晒籠，結果撞埋欄邊，有部私家車重差啲同佢相撞，好彩對方司機眼明手快避開，至未有發生車禍咋。
過氣男歌手福大命大避過一劫，但當時重未識驚，一落車就衝埋私家車司機身邊，發晒茅鬧人，對方梗係鬧番佢轉頭，話佢差啲害死人，點知過氣男歌手指住對方個鼻話：「喂！你知唔知我係邊個呀？我係×××呀！」私家車司機一聽見佢咁講，就知佢有幾醉，不過嗰次私家車司機都算厚道，息事寧人算數，都冇報到警，否則過氣男歌手實一身蟻。