中國人成日話食嘢補身要「以形補形」，食雞腳補腳力，唔夠醒就燉豬腦……堅定流見仁見智，不過小記絕對贊成寧可信其有，既然豬骨煲已全面out咗，不如轉轉口味嚟個牛骨煲，重要一係唔食，一食就要食全牛宴，將隻牛由頭食到落腳趾尾，嚟次全方位嘅以形補形，補腳骨力有牛骨、牛筋；氣管弱有牛薑、牛心頂，至於一眾男子組，就自己睇吓有乜好嘢喇。
記者：湯瑪士 攝影：陳偉強
Model：Yannie@Salvador
山東牛魔王殺埋身
今時今日的金總統火鍋，前身係銅鑼灣的總統火鍋，於九龍城亦有分店，直至九十年代搬到荃灣現址。稱得上牛肉專門店，提供的牛款當然唔止一般火鍋店貨色，基本上講得出甚至講唔出的牛部位如牛心頂、牛薑（即牛喉嚨）、牛舌心都有供應，而且特別選用來自山東的黃牛，相比其他火鍋店的本地肥牛、美國雪花肥牛，這裏的山東黃牛絕對唔會得個薄字，有口感之餘，啖啖肉味撲埋身，未嚟過記住咪亂認係真正牛魔王呀！
成龍嬌姐都冧
不過講到最出名，一定非牛骨煲莫屬，老闆旦哥話：「我哋嘅牛骨煲係全港首製，專揀肉質鮮味嘅山東黃牛；湯底亦唔係只得牛骨，而係用牛身7個部份煮成，所以牛味特別濃郁。」難怪閒閒哋日賣30個。旦哥更透露成龍、林鳳嬌及不少馬評人均為熟客及好牛一族，其中嬌姐（林鳳嬌）亦對湯底大加讚賞。問心講，湯底好味程度，真係當湯飲都絕對頂呱呱。
解剖正斗牛骨煲$120
全個煲用上山東黃牛的不同部位，加埋京葱、蘿蔔及十幾款秘製香料等等，材料多到蓋都冚唔埋。
食盡牛全身
話明全牛宴，梗係預你嗌多幾味，除咗手切肥牛係心水必食外，牛心頂、牛舌心等聞所未聞的牛配料更加一定要試！
手切肥牛 $88
牛頸脊肉身鮮甜，雪花脂肪分布均勻，一落煲即變熟，未食已經聞到勁香牛味，包你食完以後對雪藏肥牛無興趣。
牛心頂 $28
咪以為牛心頂係牛心呀，其實係最近牛心嘅氣管，滑身爽口，又一新嘗試。
鮮黑柏葉 $28
鍾意食牛柏葉的人都會揀黑柏葉，貪佢無用過漂白水加工，大大塊黑柏葉原汁原味更一流。
肥牛粒 $88
精挑肋骨邊肉切成正方粒，老闆旦哥建議放入煲煲15-20分鐘食就最Fit，一口食落「牛油」四溢，香味濃郁。
牛舌心 $68
牛肉專門店果然食得刁鑽過人，牛舌淨係要成條牛舌的中心，貪其夠嫩滑，入口滑到好似薄切豆腐咁。
唔想食牛可以點？
花雕走地滑雞煲 $80（半隻）$160（全隻）
貪新鮮想試多幾味，不妨試試老闆極力推介的醉雞鍋，選用肉質滑而鮮嫩的走地雞，加上杞子、圓肉、北芪等藥材作鍋底，花雕酒香藥材濃郁，鍋料自然更出味。
番茄魚頭煲 $60
濃郁的番茄湯底低卡低脂又好味，加上大大個魚頭滋陰養顏，絕對係女士們至愛。
食客有say
金總統火鍋（24067729）
地址：荃灣三坡坊24號地下
營業時間：6:00pm-2:00am
座位：80個
