新正頭，八方四周同人拜年，日前喺港大見到王于漸首席副校長，財經記者就追住佢猛咁問盈保，因為佢係盈保嘅非執行董事兼審核委員會成員。王于漸都好公道，話佢哋入錯咁大條數的確有問題，真係要搞清楚發生咗乜嘢事，一切等報告出再講。
唔講唔知，鄭經翰有個威水妹妹叫鄭雲裳原來喺盈保做公司秘書，係袁天凡手下，八方問鄭大班，佢個妹知唔知情？大班話佢點知個妹咁多嘢，佢只係知個妹以前係聯交所創業板上市科主管，後來梁伯韜請咗佢去百富勤做董事總經理，後嚟梁伯韜去咗花旗，佢個妹就去咗盈保，如果佢留在聯交所，啲認股權就肥仔。
傳真︰2623-9278
電郵︰[email protected]