蒙牛乳業嘅總裁牛根生（圖），噚日宣布已經捐咗自己持有嘅內蒙古蒙牛2%股份，畀內蒙古老牛公益事業發展促進會（簡稱老牛促進會）。呢間內蒙古蒙牛由上市嘅蒙牛乳業揸住84.32%，係集團最重要嘅附屬公司，主要負責生產同出售乳製品。
老牛促進會係一間喺內蒙古成立嘅非牟利社會團體，呢個促進會需要向老牛基金分派股份所獲的收益，啲錢會用喺國內同業嘅財務資助或其他公益事業。根據捐贈條款，未經牛根生同意，老牛促進會唔可以將股權轉讓畀第三方。其實，牛根生喺舊年1月，已經將喺蒙牛乳業及內蒙古蒙牛所得的現金紅利其中51%，捐咗畀老牛基金。
送股之後，牛根生喺內蒙古蒙牛嘅持股量由8.18%減至6.18%，加埋其他三名執行董事同五名發起人，可使用嘅投票權亦由超過10%減到9.95%。除咗做善事，捐贈股權後，內蒙古蒙牛不再是蒙牛乳業嘅關連人士，可謂一家便宜兩家着。