世界體壇盛事，現在由收費電視包辦晒，每個月唔想畀錢，就冇NBA睇，冇歐洲足球睇，冇超級碗睇，冇六國欖球大賽睇，冇澳洲網球公開賽睇，冇全英羽毛球公開賽睇……當然世界盃係在收費電視直播啦，如果你係體育迷，家中電視冇接駁到有線電視與NOW會十分勞氣。
咦，奧斯卡頒獎禮喺三月六日舉行，竟然喺無綫電視直播喎，全港報紙都講李安，講《斷背山》，咁李安會唔會成為第一位華人奪得奧斯卡最佳導演獎呢？《斷背山》會唔會攞最佳電影獎呢？李安面對啲荷李活勁敵，位位猛嘢，李安雖然話得過好多獎啫，但奧斯卡有特別地位，零舍唔同吖嘛。三月六日係星期一，無綫明珠台早上八點開始轉播，應該到咗中午十二點後就知道李安是否得獎喇，啲大獎（最佳導演、最佳男女主角、最佳影片等）喺洛杉磯黃昏時間、美國東部晚上黃金時段先至會宣布嘅。可惜左丁山要返工，想睇都唔得。
但係，咪住，原來到咗最緊張時刻，中午十二點後，無綫明珠台就會中止直播，正如場波踢到加時射十二碼分勝負，電視台就「咳」，等你冇得睇，你話幾冇癮。明珠台每日中午開始，就要播教育電視（邊個會睇？返下午校嘅學生會咁乖？有幾多個？）唔可以繼續直播奧斯卡。等晚上重播嗰陣，係人都知李安得唔得獎喇？所有緊張氣氛冇晒，煞風景之至。唔怪得有啲老友話情願收費電視搶到直播權，唔使理會甚麼教育電視！
準時播教育電視，係免費電視發牌條件之一，唔準時播出，要廣管局（TheBroadcastingAuthority）批准，但廣管局話播映奧斯卡不是公眾利益，一於唔批，無綫為之冇符。到時睇緊奧斯卡頒獎禮嘅，相信有幾十萬人，要睇ETV嘅，幾百位？何謂公眾利益，任你講，官方話係就係。