恒指最多跌過82點，埋單只跌31點，而炒家對H股則仍熱情未了，個市估計繼續反覆向上。
東亞銀行（023）本周五派全年成績表，大行預咗只係增長輕微。東亞昨日收24.05元，微升0.15元。
東亞兩日後盤數彈出，如果增長真係輕微，則股價將無大變化，但如果好過輕微少少，則可能會令其他銀行股受捧。
滙控C輪4885：滙控（005）收128元，跌0.40元。C輪4885收29仙，跌3仙。
滙控農曆新年以來，股價由129.70元，跌到𠵱家，唔見1.70元，亦已經填補咗1月上旬嘅上升裂口，估計守得住，可趁機買啲C輪。
C輪4885係理想博反彈對象，4月初夠鐘，溢價0.7%，槓桿率44.1倍（有效23.9倍），引伸波幅13.5%。
滙控係大牛龜，唔適宜預期喺兩個月內有大動作，但股價上番1月初高位131.90元，隻輪已可見59仙，喺29仙上車，有機會贏1倍。
中電信C輪9886：中電信（728）收2.975元，唔見1格，3日前高價3.10元。呢啲重磅股，跌到咁上下又會反彈。
買中電信C輪炒短線，最靚對象始終係9886，7月中到期，輪價40.5仙，溢價2%，槓桿率7.4倍（有效5.6倍），引伸波幅28.5%。
章盛