尖沙嘴凱悅酒店重建，噚日切完燒豬正式拆樓，戴德梁行由策劃到起好出租，一手包辦，聽佢哋講，最新構思係一幢二三十層純商場，有迷你戲院、商場及餐飲，集吃喝玩樂購物於一身。
同區亦係喺彌敦道嘅東英大廈，會重建為銀座商場，業主華置講過，爭取起多個地鐵出口，與商場連接，第日同凱悅有得揮，大家都係尖沙嘴地鐵出口。
蘭西成日路過東英大廈，發覺重建搞得好快，前日先搭咗一半棚，噚日就成幢有棚包圍晒，隨時拆得咁話，唔通真係要同凱悅爭一日之長短？
尖沙嘴係傳統旅遊區，但係新式銀座商場重未有，凱悅與東英要同現時區內最有規模嘅尖西海港城對撼，當然要搞新意思。
凱悅有五十七萬呎，東英四十萬呎，兩者都係由原本計劃半寫字樓半零售，改為純零售，皆因時下流行嘅場要夠大、店舖種類要夠多夠齊，令消費者喺埋一度一站式消費，一家大細行足成日玩到夠。
電郵地址：[email protected]