洪朝豐上星期四忽然入住東區尤德醫院嘅精神科病房，雖然佢唔肯透露入院原因，但噚日有周刊報道話佢上星期四蒲完基吧之後，同兩個男仔返佢藍田屋企，由於屋內聲浪太大，有鄰居投訴，驚動警方到場，洪朝豐被送咗去聯合醫院急症室之後，又因為大吵大鬧，第二日就被轉介去東區尤德醫院。報道又話洪朝豐近年為咗𠝹仔而停服導致佢不舉嘅精神科藥物，結果令佢再次踏上瘋癲之路。
佛偈避回應
馮仁昭噚日探洪朝豐，佢話連日唔少傳媒探佢，騷擾到其他病者家屬而向醫院投訴，所以佢決定由今日開始唔再接見任何傳媒。
馮仁昭問洪朝豐今次入院係咪雜誌所講嘅原因而入院，佢就攞起紙筆寫咗成篇佛理，話「假亦真時真亦假，假假真真又何妨……（下刪三百字）」即係講完等於冇講，馮仁昭臨走時，洪朝豐一再強調佢有定時食藥同睇醫生，叫大家唔使擔心喎！
