迪士尼究竟搞乜鬼？點會喺新正頭整單咁倒米嘅嘢出嚟，唔單止倒嘅係迪士尼自己招牌嘅米，亦大大倒咗香港嘅米。首先香港迪士尼樂園香港人先係大老細，我哋打本你嚟運作，竟然在新正頭期間搞到咁大吉利是，我哋以後點面對國內嘅同胞，春節期間大家求個好意頭，人家一早訂好晒入場券，整個假期亦圍繞迪士尼而計劃，如今急趕而來，失望而回，你話點擔當得起？
曾特首在電台節目中話迪士尼有關方面算漏了一招，未能預測春節期間中國遊客的數目，對此感到惆悵，其實曾特首算有口德，迪士尼今次根本就係衰「睇小」呢兩個字。開幕至今入場人數未達預期數字，睇小你就算春節假期都係咁上下，點知中國人過年大過天，最緊要玩得開開心心，千金散盡都還復來，結果樂園方面倒瀉籮蟹，唯有落閘截人，此動作再睇小咗春節期間嘅中國遊客，就算鐵閘更高更強，閘頂嗰啲鐵枝再尖啲都好，難擋中國同胞入場嘅決心，同胞們眾志成城，大有推倒柏林圍牆之勢，另一邊廂，大漢施展梯雲縱輕功揚長越過鐵閘，師奶們更似是投奔自由一樣將親生骨肉推過尖尖的閘頂讓小朋友投向歡笑樂園開心地。同時也睇小了已入場的旅客，不少人只在樂園內繞了半個圈便因為過份擠擁而怒氣沖沖離場，盡顯一身俠膽骨風。
中國各城市都出盡法寶扭盡六壬招徠遊客，迪士尼作為香港旅遊業的橋頭堡，唔該以後真係要醒醒定定，嬲咗迪士尼事小，嬲咗香港事大，記住記住千祈千祈唔好再睇小中國同胞。