煲呔做咗禮賓府主人，點都應該請晒各界友好去官邸度聚一聚，噚日中環啲車路塞死晒，之唔係所有達官貴人，都坐住架靚車趕去禮賓府做客人囉，全城嘅有錢佬，例如誠哥同佢個大仔鉅鉅、郭氏兄弟同李兆基等，都畀面抽時間出席。
一眾坐上客中，包括咗老董，但佢只單刀赴會，董太冇咗影，可能費事觸景傷情。因為政改同煲呔撐到行嘅陳主教都有出席，但可能人太多，場地又唔太適合，所以兩個人只係求其寒暄一番，講吓啲新年祝福語就算數，陳主教重祝願煲呔新一年愈做愈好，點好法？就係要全面照顧市民福利，真係好為大眾着想。
長毛唔畀面煲呔
民主派人士出席者唔多，肥仔明去咗一陣就走，話入面人頭湧湧，又焗又熱，乜都傾唔到；湯大狀就好啲，同煲呔傾到兩句偈，趁啲喜慶日子，問煲呔有冇嬲佢哋，煲呔不但話冇，重應承遲啲搵佢傾偈，唔通新年賣大包？
由於係主人翁嘅關係，煲呔同太太噚日就企咗喺門口成日，迎接尊貴嘅嘉賓，重逐一握手大晒自己好有誠意。呢期主力講和諧嘅煲呔，致辭時都係講番呢樣嘢，佢話香港嘅百花中，有啲重含苞待放，有啲種籽則喺泥土中醞釀，等待萌芽出土，但真正嘅萬紫千紅，重有待大家努力爭取，講到好鬼婉轉，但偏偏冇講紅杏呢種花。
佢亦都講到，未來十七個月會集中搞好經濟，會按民意訂出具體工作次序，務求喺任內做出一啲成績喎。
長毛其實都係獲邀嘉賓之一，佢重帶埋個裝有豬腦同豬肝嘅乞兒兜上去做入伙禮物，乘機抗議吓小圈子選舉豬狗不如，但由於警察唔畀佢帶埋啲禮物入去，所以佢最終憤而燒咗張請帖，認真唔畀面。
爆料熱線：29290000、27860099
報料傳真：26239278
報料電郵：[email protected]
