大陸彩票股早排炒得火熱，但昨日龍頭股華彩控股（8161）突然玩插水，一度最低跌至2.50元，收2.925元，仍然跌8.59％，成交股數7449萬股，金額2.09億元。
小初問經紀黃隻股發生乜嘢事？佢話周圍問過，都係話公司一切如常，無事發生。
另方面，江湖則盛傳有對沖基金玩嘢，所以先至有噚日嘅驚險場面。
華彩去年變身彩票股後，股價累積升幅驚人，再大幅炒上並唔容易，相反向下炒則較容易，因此造就對沖基金的活動空間。
隻股早排由4元樓上跌落嚟，連配股價亦失守，人心已變得虛怯，噚日突然大沽盤殺到，真係咩貨都震晒出嚟。
另外，上周末經紀黃推介的麗新國際（191）昨日突然發力，急升15.25％，收0.68元，成交股數6331萬股，金額4130萬元。
經紀黃話，上次講到遠東發展（035）減持麗國，但有芬佬密密增持，原來呢個基金持有麗國權益去到9％，難怪升得咁勁。
慕容小初