大市今個升浪，以中資股嘅升勢最為矚目，但唔少二三線股，都唔經唔覺咁升咗，而且升幅亦幾可觀。今日推介嘅浩倫農業科技（1073），物超所值，股價重有好大嘅上升潛力。
浩倫係超級冷門股（噚日成交金額只係16萬元），呢輪股價有異動，幾日之間，由0.33元升上0.48元，之後回軟落0.42元，噚日收0.445元，升1.5仙，調整完成再起升浪，升破0.48元阻力，上升目標0.63元。現水平入市，有機會博賺40%。
浩倫公司雖小，但生意好大，中國正大力扶助農業發展，未來兩三年浩倫可以講係食正呢個大浪，由於生意額大，只要利潤率升一兩個巴仙，盈利有機會翻幾番。
浩倫發行股數4.21億股，市值僅1.87億元。05年度（6月結算），營業額16.4億元，升99.6%；獲利2151萬元，升44.5%；每股獲利5.1仙，升30.7%；股東資金3.34億元，每股淨值0.793元。
未來盈利可大增
集團主要在內地經營農藥同肥料的產銷同貿易業務，同時亦有提供植保科技的顧問服務，過去4年成功轉型，建立一套完整的供銷渠道，上年度終於扭轉了連續3年純利回落的趨勢。由於公司大力拓展貿易業務，已自行開發電腦系統支援（包括供應鏈管理、中央財務及流動資金管理平台），預期盈利將會大為提升。
現年度，估計浩倫盈利可達3500萬元，升62%，每股盈利8.3仙，以8倍PE計，股價已可升上0.66元。未來一兩年，浩倫盈利仍會保持高增長。
大市噚日反覆，恒指跌31點，但期指則上升31點，又變番高水，中資股更加係大強勢，H指收6471，又上升67點，再創出97年中以來的新高。近期推介的大強勢股，中油（香港）（135）、哈爾濱動力（1133）、東方電機（1072）同中國海外（688）等，繼續有好表現，可持有到心動的水平才回吐。
上周推介的首長國際（697），仍在0.60元水平整固，近期資源同金屬股都已大升，首國股價可算好落後，一升破0.61元阻力，就會發圍，昅實可也。
郭兆誠