今年雙春兼閏月，喜事多籮籮，Eason正式迎娶徐濠縈、重有李克勤嘅攞獎求婚宣言、還有吳家樂娶豪門淑女事件……亦有雜誌傳Kelly（陳慧琳）同男友Alex打算結束愛情長跑拉埋天窗，更誇張嘅有阿Rain（李彩華）要操fit自己準備生狗仔，生個「狗寶寶」即時成為熱潮。
事實今年的確喜事重重，唔止香港，「海外狗媽媽」亦唔少，有畢嫂安琪蓮娜祖莉、畢哥舊愛姬妮芙柏露、湯嫂凱蒂荷姆斯等、台灣地區主持人陶子、本地代表也有「長毛嫂」吳君如和「鵬嫂」王菲。佢哋嘅寶寶會係乜樣？而蜜運中嘅藝人食胡機會又有幾大？有請堪輿學家麥玲玲幫佢哋測一測。
記者：陸伊琳
部份攝影：何家良
（以上全是設計對白）
堪輿學家麥玲玲師傅表示，最緊要生個健健康康的小朋友，冇話邊個剋住邊個，凡事都有解決的方法。
李彩華專心事業喇
新鮮滾熱辣梗係即睇Kelly同阿Rain嗰兩單先喇。麥玲玲表示：「屬牛嘅Kelly今年似有喜事，結婚、搬屋都是喜事，至於會唔會有埋餡，就唔多似了。」另一個娛樂頭條就是阿Rain，最近阿Rain活躍番娛樂圈，但亦有人傳她最近狀態大勇，操fit身體，同蕭定一生番個狗B，麥玲玲笑笑口：「今年李彩華行緊事業運，工作、財運都好旺，唔似會生仔及結婚。」咁一向感情穩定的周慧敏同倪震，又會不會一鳴驚人，生番個孫仔畀倪匡抱吓呢？麥玲玲斷言否定了，「佢哋嘅關係會繼續穩定繼續恩愛，結婚生仔都唔會，不過要是周慧敏全面復出，聲勢一定勁到爆。」
Eason𢱑銀唔生仔
克勤屬羊、盧淑儀屬牛，命格似雙喜臨門，結婚加生仔一齊來都不出奇，麥玲玲補充：「克勤五行屬木，今年一定有喜事，至於生BB，唔係今年就係下年嘅事。」而啱啱攞咗四台聯頒傳媒大獎嘅Eason會不會在狗年再追多個？麥玲玲表示：「Eason屬雞，今年事業高飛、行大運，唔似會生狗B，出年或後年機會較大。
阿菲BB唔啱Key
至於屬蛇嘅君如，麥玲玲表示佢嘅狗寶寶會同佢頂撞較多，水火不容，有冇咁誇呀？計我話，有邊個仔女唔駁父母嘴，而且君如把口咁厲害。不過好彩長毛屬虎，與狗B關係唔錯，麥師傅重話係能共患難嗰隻，咦，分分鐘聯手對抗君如！
無獨有偶，阿菲同佢個狗B嘅關係跟君如不相伯仲，麥玲玲笑笑口話：「睇阿菲個命格點只狗仔，連豬仔都會有，似三年抱兩！」咁勁！不過麥玲玲提點，今次應該開刀生好啲，皆因狗B同阿菲唔多啱Key，所謂雞犬不寧，唔啱傾。睇嚟阿菲、君如與同樣屬雞嘅陶子真係要研究一下湊仔經。至於屬豬嘅李亞鵬，麥玲玲話佢會好盡力栽培個BB，唓，父母有邊個唔偉大吖！
燈籠有喜
麥玲玲教路，今年想生個狗BB添丁發財嘅，可以喺屋企嘅西南面放一個紅燈籠，因為今年呢個方位係喜事位，大家想有喜不妨試試。
