新年特別多喜慶，好似喺香港成立咗兩年嘅凱萬資產就細屋搬大屋，噚日擇吉日開張，美國總公司嘅高級副總裁Diederik專登飛嚟主持大局，佢重入鄉隨俗，同香港話事人莫健歡齊齊親手點睛同切燒豬（圖），又主動派利是，𠱁得大家鬼咁開心。
Diederik同華華講，第一次做呢啲中式儀式，覺得好得意，事關喺歐美，有乜喜慶都只係飲吓香檳碰吓杯，今次就熱鬧盞鬼好多。佢話雖則嚟過香港好多次，但一啲廣東話同普通話都學唔識，但就好鍾意食中餐，特別係北京填鴨，講起都流口水！
凱萬兩年來業績唔錯，加上業績達標，加人工同埋分花紅都走唔甩。莫健歡話重會繼續請人，事關佢哋今年會發展台灣市場，正同當地復華信投傾緊銷售細節，預計年尾可以喺推出11隻基金。