話說噚日利世民獻計，叫盛智文一石三鳥解決迪士尼、海洋公園同旅遊發展局三大花筒。殊不知今日米老鼠總裁就出嚟話，傾緊喺上海再開多個主題公園。學米老鼠今年嘅年報話︰Thebestisyettocome！即係話好戲在後頭！
唔知道智慧過人嘅特區高官諗緊乜？不過利世民就會叫佢哋乜都唔使諗，因為米老鼠嘅套路專對付官僚，所以特區諸公最好以不變應萬變，剝定花生等睇戲就算喇！不過，世民明白為官者要做啲嘢向市民交代。出於愛港愛國嘅熱情，利世民亦只好傳授一招畀英年，等佢可以幫香港止蝕。
米老鼠嚟香港嘅目的不外乎搵錢，所以特區首先要令佢哋明白，要搵錢就唔該好好增加營運收入，唔好再打庫房主意，如果唔係就連小小錢都無得你搵。董痛腳當年違反基本法量入為出原則，畀人知道庫房大門無上鎖，咁人家當然有大食大唔放營運收入在眼內。雖然𠵱家話係強政勵治，不過大家都明白政府嘅嘢講就天下無敵，做就有心無力。所以對付米奇老鼠，更加唔可以單靠口講，重要有破釜沉舟嘅實際行動。
請自行籌款建二期
相信當年董痛腳同米老鼠嘅協議，一定有話唔畀公開營運資料嘅條文，呢個其實對香港百害而無一利，所以𠵱家就算回報率有幾低都無人知。不過如果將主題公園賣盤，就唔使公開內容，只要睇個轉讓價，大家即刻心裏有數國企米奇公園每年搵幾多。其實政府畀多的折扣都無所謂，反正已出之財庫房收番少少當執到，市場上一定有基金有興趣。
政府花咗納稅人百幾億，如果呢次賣盤執得嗰幾十億，你話上海市政府會點諗？佢哋可能會話︰儂蝕本，阿拉會小心！你估上海米老鼠公園重有無咁容易傾得成？好！就算畀佢哋傾得成，賣盤仍然百利而無一害，至少可以畀米老鼠知道，國企主題公園二期請自行籌款，政府已經全身而退，唔一定要老馮投資。睇你重敢唔敢再幫香港趕客！
利世民