成立咗三年嘅香港上市公司商會，噚日喺美國會開Party，由於幾個主要搞手何猷龍、蔣麗莉、胡文新、邱達根都係富豪第二代，又搵到局長馬時亨做主禮嘉賓，所以嚟捧場嘅人都唔少，好似李業廣、周文耀、詹培忠、趙國雄、余錦基等都有到，但講到全場最搶鏡嗰個，就一定係賭王何鴻燊！
燊哥雖則係以名譽會長身份到場，但實則就梗係嚟捧個仔場，佢影完相之後都唔走住，大家就知佢一定又有嘢噏！佢話：新嘅一年，香港前景會好到不得了，事關教宗已經明籲所有嘅天主教徒，唔好干預政府，我哋嘅主教應該識聽，唔好再追住嗰時間表，又話如果政改可以順利通過嘅話，樓市會升五成咁話。唔怪得記者咁鍾意見到佢，實在娛樂性豐富，噏得出就噏。
講完政治佢又講息口，話六個月內唔會再加息，唔止同任志剛唱反調（任總啱啱至講話息口未見頂），重話夠膽同任總賭一鋪，幾大都受，買1萬賠2萬，當正香港係葡京。3月美國就議息，大家真係要放長雙眼睇睇。
燊哥之後再講自己澳門嘅生意，佢話直頭係一枝獨秀，成世人都未試過咁開心，朝朝早都有大堆人排隊嚟進貢！一眾賭仔聽到佢呢番說話，唔知有乜感受呢？
李華華