肥仔K睇慣漫畫，睡房內藏有不少日文版漫畫書近五百本，呢日來電話：「有冇睇過丹麥報紙諷刺宗教嘅漫畫呀？」冇噃，香港報紙唔敢轉載嘅，以免引起激進伊斯蘭派報復。CNN都唔敢啦，佢哋報告新聞時，左丁山見到幅有關穆罕默德嘅漫畫，打晒格仔，根本唔知係乜東東。主播話打格仔有兩個原因：（一）CNN恐怕遭受報復；（二）恐怕被批評對宗教不敬。兩個理由都有道理，第一個比較誠實啲。
肥仔K話網上有一個博客blog可以睇到漫畫，佢上過，呢個blog重徵求各類諷刺伊斯蘭教嘅笑話㖭。但呢個blog在上星期日已經在Google唔見咗，大概係Google自律啩。講起嚟就好笑，丹麥報紙話西方報紙唔應該自我審查，故此刊出諷刺宗教嘅漫畫，但美國人日日講新聞自由，其實最知道何時收口兼自律，永唔會得罪米飯班主或有武力報復慾望嘅勢力。
根據肥仔K所講，丹麥報紙十二幅漫畫，其實諷刺各大宗教，只不過穆罕默德嗰幅就惹下大禍。佢話日本漫畫有唔少豈止諷刺直情係好露骨咁痛罵南韓、中國嘅漫畫，最佳例子就係七、八個月前出版嘅「嫌韓流」，如果歐洲有出版社膽敢出版一本類似漫畫，叫做「嫌伊斯蘭流」，相信會觸發大規模血腥事件。
漫畫本來係輕鬆幽默嘅傳訊工具，不須太認真，估唔到會發展到成為引起憎恨、暴動、外交糾紛甚至乎誇張啲講，引發文明衝突！漫畫簡單易明，唔識字都可以睇得懂，從呢方面講，漫畫家比理論家更有威力，筆桿子寫評論，影響冇一幅漫畫咁大噃。名漫畫家如尊子，唔係講笑，一定係香港最有影響力嘅五十名人物之一，各位老友望子女成龍，教佢哋讀書寫字之餘，不妨叫佢哋學埋素描，為以後學漫畫打好基礎。如果尊子肯開班授徒，人龍會由亞厘畢道排到威靈頓街。