新正頭，我阿利都派唔少利是。一年一次，我哋啲老嘢係要喺呢啲時候先至受歡迎，該煨。
有啲世姪同我拜年時，唔經唔覺都就快大學畢業，𢭃完利是，重問我有乜嘢工好介紹。一啲想做銀行，有啲話想做商業顧問，還有幾個問我做會計好唔好。
照計入會計師樓做幾年當學師總有着數，有好多工都唔請freshgrad，要你有幾年經驗加個MBA先可以入行。頭幾年留響會計師樓見吓世面，順便攞番個牌，不失為一個尚佳嘅事業起步。
不過，我阿利都警誡啲世姪，𠵱家入行做嘢真係辛苦到嘔，如果過慣大少爺大小姐生活，肯定兩嘢劈炮走人，頂唔順。
例如我有位世姪，響一間四大做嘢。早排幫一間礦股搞上市，就響個礦附近住咗幾個月。講明係礦，緊係唔荒會響上海北京呢啲繁華城市，一定喺啲「山卡拉」地方。重有，呢啲地方，莫講話五星級酒店，連賓館都唔多間，卒之我個世姪就要瞓礦工宿舍。唔止咁，沖涼都要同班礦工一齊肉帛相見。呢啲重唔係訓練嬌生慣養嘅少爺最佳嘅特訓？捱咗一排，我個世姪終於頂唔順，辭咗工。佢老細問佢點解，佢話：「冇諗過做會計師做成咁。」
所以話，我一早嚇定啲世姪，千祈唔好有幻想，亂入行，咪第日做做吓發覺唔對路，怨我一世。