名模琦琦與夫婿任達華農曆新年飛往英國三日度歲，為囡囡買衫兼大啖咖喱蟹。不過兩晚都沒覺好瞓，皆因半夜要走火警，琦琦還發揮模特兒換衫絕技，兩分鐘內全副名牌武裝逃生。
琦琦與丈夫任達華農曆年初一飛到英國倫敦三日，為囡囡Ella置裝及品嘗美食，兩人走勻英倫商店H&M、Gap等，狂買兒童運動服及玩具，又乘機到唐人街的東海大啖咖喱蟹。
勁食咖喱蟹
琦琦說：「今次真係勁食一番，我哋三日食足三餐咖喱蟹，重打包一碟上飛機食㖭！」她又透露三日兩夜旅程中卻沒覺好瞓，琦琦說：「第一晚半夜兩點，酒店alarm突然長響，應該走火警。我哋即時起身換衫，老公重記得拎埋passport同銀包，我哋一路跑樓梯已經聞到燶味，跑到落地下先知酒店後樓梯燒着垃圾房。當時倫敦街頭得零下六度，見到啲外國人冇着鞋、着背心短褲逃生，我就攞埋Gucci袋，重有Dior帽保暖，都覺得自己幾叻！」
買樓買上癮
至於第二晚睡夢中再次響警鐘，琦琦急忙爬起身才發現原來是朋友越洋致電賀年。琦琦謂今次英國之行本想順道為女兒Ella在倫敦買樓，但太急趕不及，她說：「其實我哋已經喺英國有兩間屋，不過想買一間畀Ella大個住或者旅行，今年夏天帶埋囡囡飛去維也納屋企探公公婆婆，會先去倫敦再睇屋。」
撰文：DebbieLum
