噚日喺校長府邸同記者團拜嘅港大校長徐立之，心情極之靚，重向在場記者大派「如意」利是，利是內有一張揮春同埋一個結咗如意結嘅電話繩，徐校長重介紹如意利是內嘅揮春係來自港大中文系系主任單周堯嘅手筆，以楷書同篆書混合寫成，好特別㗎！由於全部都係人手製造，港大話每個結嘅製作時間都要成十五分鐘。
一家四口分布四地
正所謂每逢佳節倍思親，原來徐校長今年新年都冇同兩個仔仔及太太度過，佢話𠵱家一家人要分散喺四個唔同嘅地方，兩個仔喺倫敦唔同嘅地方，太太就喺加拿大。徐校長好難得早排先至抽到時間返加拿大探吓校友同埋太太，而聖誕節相聚時好辛苦先影到一張全家福，之後家中各人又返到自己嘅工作崗位。
八方又向徐校長八吓禽流感嘅問題，徐校長話佢每朝喺港大，都見到好多好靚嘅雀仔，重有白色嘅鸚鵡㖭！佢話不過禽流感殺到，都係要人畜分隔好啲，以確保安全。
爆料熱線：29290000、27860099
報料傳真：26239278
報料電郵：[email protected]