中國人最重視農曆新年，所以有乜事，一係就過年前搞掂，一係就等過完年先搞；用13億收購美國Vitaquest八成股權嘅長江生命科技，就係後者。
噚日李超人嘅親戚甘慶林行政總裁同華華講，如果唔係撞正過年，個Deal應該一早完成，不過為咗畀班員工返港過年，所以噚日先公布。
甘總裁同華華講，近年公司不斷收購保健產品公司，自己對呢方面都好有經驗，朝朝都有食保健產品，咁食啲乜？佢就一味耍太極，話唔同嘅時候有唔同嘅需要，但就點都唔肯講！食保健產品好平常，使唔使咁神秘？
長科今次收購嘅Vitaquest，同上年收購嘅SanteNaturelleLtee，同樣係由第二代嘅繼承人賣出嚟，有傳媒問甘生對啲第二代賣家產有乜評價？佢就一味帶大家遊花園。咁又係，佢老闆小小超都係第二代，呢啲問題梗係少講為妙啦！