為咗保障客仔嘅利益，所以執業律師要買保險，以防一旦俾客人捉到痛腳要索償；但現行嘅律師保險制度千瘡百孔，將所有律師全部綑綁埋一齊，如果邊個律師俾人索償，其他律師就要一齊幫手填氹，變相由啲紀錄良好嘅律師，補貼啲唔掂嘅律師。
大狀黨吳靄儀近日就忙緊幫啲律師，搞個新嘅保險計劃，佢噚日叫咗一班律師同傳媒申訴。吳大狀話，啲律師𠵱家希望，唔好再搞啲綑綁式制度，應該好似醫生咁，自己幫自己買保險，咁就唔會俾啲害群之馬拖累，自己孭番自己嘅風險。
政府對呢個建議反應麻麻，都係覺得綑綁式比較好，因為點都有班律師包底。但係，律師同大狀唔同，律師一直係政府嘅大好友，如果政府唔肯讓步，搞到啲律師都要被迫上街抗爭，與政府為敵，甚至加入晒大狀黨，到時就難搞啦！
爆料熱線：29290000、27860099
報料傳真：26239278
報料電郵：[email protected]