港股在上月中的低位有支持，噚日先跌後升，恒指收15548，升118點；中資股的升勢更為急勁，H股指數收6403，大升201點。
近期推介的中資股，兩隻電機股哈爾濱動力（1133）同東方電機（1072）都已創出新高，中油（135）亦創出97年後新高價。哈動收6.60元，升0.30元；東機收10.45元，升0.45元，兩股都見基金同大行仍在收貨，後市仍有頗大的上升空間，哈動初步目標係7.20元，東機係12元。
中油走勢浪高一浪，收2.45元，升0.175元，升幅7.7%，成交近3900萬股，中資線話中油股價在新春期間會有一番新景象，果然對辦，有貨在手者，揸實可也，短線2.60元，中線睇3字頭。
月初推介中民燃氣（681），當時股價0.48元，噚日已高見0.65元，收0.63元，再升2仙，聽講好快就會有進軍彩票業務嘅新消息，可以0.60元為止賺位持有。
07年後盈利將大增
今日推介金威集團（910），呢隻係已轉型、而又有好大機會可以食大茶飯嘅股票，值得留意。
金威收0.198元，升9個位，早輪由0.15元裂口高開急衝上0.21元先出現調整，形成上升三角形，噚日再破位而上，短期目標係0.25元。至於中線，只要新轉型業務完全成熟後，股價唔排除會翻幾番。
金威做開製衣同納米，新業務係轉型植林業，以5.6億元收購北京萬富春股權70%，賣方承諾12月止的06及07年度，每年稅後盈利不少於2億元，以收購價計，相當於PE2.8倍，對金威非常有利。
要注意嘅係，每一批幼苗可供8年收割之用，而每8個月可收割一次，還有，第二次長出的樹木產量，可較第一次多出一倍，即係07年之後，盈利有可能會倍升，以每股盈利5仙計，預測PE8倍，股價已可升上0.40元水平。重有，今次收購，金威係以現金、新股同可換股票據支付，若可換股票據全部行使，萬富春的兩位賣家便合共持有逾44%的金威，成為最大股東。由於可換股票據可以轉讓，唔排除日後會有新的安排，值得憧憬。
郭兆誠