新上任嘅公務員事務局局長俞宗怡，上任兩個禮拜之後，開始逐個同公務員工會見面，當係溝通又好、拆彈又好。佢噚日首先同紀律部隊評議會開會，紀評主席倪錫水話，俞宗怡主要係交代佢未來工作目標，又話留意到一啲紀律部隊可能出現嘅斷層。至於今日佢就會同高級公務員評議會見面。不過，真正同佢埋牙肉搏嘅公務員工會聯合會，就未定到會面日期。工會主席梁籌庭話，俞宗怡當年曾經話過，公務員唔應該只係減薪百分之六，應該要減多啲，呢句說話大家一直記喺心處；重話工會同佢冇乜好傾，又已經準備好戰鬥嘞！睇嚟以俞宗怡一貫硬朗作風，佢同梁籌庭將來好有機會擦出火花。
爆料熱線：29290000、27860099
報料傳真：26239278
報料電郵：[email protected]