今年體壇盛事首推世界杯，馬會有得賭波之後，第一次踢世界杯，一定熱爆全城。香港廣告商會主席袁文俊（圖）估計，本地嘅飲品和電子影音廣告將會增加不少；而個人電子媒體廣告市場亦有好大發展空間，尤其香港人平均擁有超過1部手機。不過佢都明白香港人好厭惡啲垃圾電話宣傳廣告，所以喺發展手機影音新廣告時，都會小心處理，以免消費者對呢個新媒體留下壞印象。
袁文俊噚日出席電台訪問時就話，去年本港廣告市場規模有450億港元，較04年上升約1成；國內廣告市場增長則達21%至370億美元（約2878.6億港元），跟日本380億美元市場好接近，超越日本指日可待；不過相對於美國嘅1000億美元，仍然相距好遠。袁主席以前做過期交所，唔知日後港交所出新產品，會唔會搵呢位轉投廣告界嘅舊人幫吓手？