昨日開市前，相信冇幾多人夠膽估恒指會升百二點，更加冇幾多人估中H股指數升二百點（3.2%）。油價儘管上升，但日股上升帶來支持。
港股夠惡，狗年頭3日跌足3日後，又再嚟過。
國內保險股隻隻生猛，國壽（2628）彈上5.8%，收報8.20元，平保（2318）移高3.3%，收報17元，中財險（2328）進帳3%，收報2.575元。鎖定稍為落後嘅國內保險股，搵相關C輪短炒。
平保C輪9464：平保C輪16件，普遍交投唔多，最旺嘅係9464，數據最靚嘅亦係呢件。隻輪8月下旬到期，輪價30.5仙，溢價1.9%，槓桿率5.6倍（有效4.9倍），引伸波幅24.3%。
嫌爆炸力唔多夠，則揀9443，輪價2.40元，平水，槓桿率7.1倍。呢隻時日無多，下月14日最後買賣。
9547好長壽，明年12月夠鐘，溢價9.9%，但冇乜爆炸力，槓桿率得3.7倍（有效2.9倍），引伸波幅30.1%。
中財險C輪9513：中財險C輪選擇更少，9513比較啱睇，3月初夠鐘，輪價55仙，負溢價1%，槓桿率4.7倍。留意本月23日最後買賣。
想爆炸些少，揀9637，買賣更難，昨日得10萬份易手。
隻輪5月底到期，輪價39仙，溢價3.7%，槓桿率6.6倍（有效5.1倍），引伸波幅35.7%。
章盛