實在，10萬蚊可以買到好多隻Tiffany戒指‥‥‥如果對方唔嫌你無新意；10萬蚊亦夠擺10幾圍鮑翅宴‥‥‥如果你娶得成老婆嘅話。歸根究柢，求婚成功先係重點；情人節就到，五星級酒店破天荒推出天價接近10萬蚊（HK$98,888）嘅求婚一條龍套餐，教你豪到盡去冧女。千金散盡人安樂，結局有兩個：對方開心起上嚟，幾卡鑽石分分鐘就此慳番；又或者，對方嫌你亂使錢，嬲爆爆鬆人；一於今晚攝高枕頭諗清楚，作出你人生嘅最重大決定！
記者：李慧慧
攝影：楊錦文
Model：Bonnie、Jonny(Salvador)
一入豪門深似海
求婚注定勞民傷財，不過錢一樣可以使得好冧。2月14號情人節當日，你的欽點求婚對象將會由專人以極盡奢華的勞斯萊斯從家中接送到第一站：高級時裝店TheSwank揀選最華麗的晚禮服、鞋及配飾，為「矜貴」的一天裝裝身；裝完身下一步梗係執正個樣，套餐包括專業髮型師及化妝師，務求你倆成為當晚全城最正的一對情人。靚晒！就可以前往是日焦點之一的總統套房。
豪歎黑松露菌餐
10萬蚊點少得入住豪華總統套房一晚？位處25樓頂層的總統套房一燈一床都極盡浪漫，甜言蜜語一番後，係時候上主菜─豪華黑松露菌晚餐。由國際級名廚岑柏濤親自操刀的5道黑松露菌佳餚，重有靚酒香檳配埋，不過都唔係最重要，私人宴會廳加小提琴伴奏先係冧女絕招，未夠？趁住半醉拖佢漫步到鋼琴旁，輕彈淺唱一曲，冧啦啩？至於邊一刻求婚就自己話事啦。
朱古力玫瑰慕絲
朱古力一向跟情人節分不開，朱古力甜到漏，慕司入口香滑得很，由內至外都是「thesweeetestthingintheworld」。
雅枝竹黑松露菌濃湯
黑松露味道濃郁，用以煮湯絕對是上佳配料。黑松露湯是廚師的「secretrecipe」，只能透露以傳統意大利風格加上個人創新；湯，有着濃濃的黑松露菌味道，火腿跟雅枝竹同時帶來陣陣清新氣息。
黑松露菌伴帶子
大大粒帶子肉，加上適量的黑松露菌，頭盤賣相精緻，一口一個剛好。帶子的海鮮味道屬淡淡清香一種，不需多作調味，清甜味跟黑松露菌的濃郁配合得恰到好處，誰也不搶誰的風頭。
紅椒黑松伴斑片
黑松露甘香而帶草腥味，廚藝未到家，黑松露便會只腥臭而不甘香。酒店意籍大廚選擇以石斑魚入饌，利用石斑的鮮甜把黑松露的草腥中和，再配以清新的紅椒，石斑入口份外香甜。
10萬套餐清單
勞斯萊斯接送
TheSwank晚裝、鞋及配飾1套（只限女士）
髮型及化妝設計（只限女士）
黑松露菌晚餐:
芝士拼盤
雅枝竹黑松露菌濃湯
黑松露菌伴帶子
紅椒黑松伴斑片
朱古力玫瑰慕絲
（配頂級紅酒及香檳）
入住總統套房1晚
翌日早餐及任飲香檳
刻名水晶香檳杯1對
12公升Valentino汽酒1瓶
重有下文‥‥‥
話明一條龍，點會瞓醒一晚就算？除例牌早餐，酒店更會於結婚日送上刻名的水晶香檳杯及印名的巨型意大利Valentino汽酒做賀禮。咁你問，求婚唔成點好？呢個世界邊有包生仔㗎？最後補充，資源所限，奢華只供一千零一對情侶享用，值唔值都好，手快有手慢無！
街坊激評
對於豪使10萬蚊求婚，有人覺得太過份，有人大讚好冧，最好都係對號入座，事前查探清楚另一半點諗先！
麗嘉酒店
（25322062）
地址：中環干諾道中3號
必須於2月14日前預訂