金管局總裁任志剛噚日又上立法會接受議員質詢，當然又擦出唔少火花，不過，今次辣出火嘅唔係卿姐劉慧卿，而係潮洲怒漢詹培忠，藥引當然係金勞詹最關注的「一業兩管」問題，即係一個股票經紀行業，點解分別由金管局同證監管，銀行前者管，經紀行就後者管。呢個問題，好多經紀認為唔公道，令銀行贏晒，咁金勞作為經紀代言人，一定要出頭。
任總噚日發言時提到市場中介者利益，與大眾利益往往存在「深層次矛盾」，咁有骨，所以阿詹一開炮，就明褒實貶咁話，任總識用溫總嘅「深層次矛盾」論，證明佢有「高層次智慧」；但點解銀行麾下的證券業務，唔可以畀番證監會管，係咪連「研究檢討吓都唔得」？怒漢愈講愈怒，重若有所指咁話有人「把持職位」好耐，要改變管治態度就好難。
任總當然唔示弱，即刻還拖，話證券大法係獲得議會支持通過，又出動公眾利益，重話買賣股票，喺現代先進科技下，重有冇需要中介人都成疑問！任總最後大阿詹，話如果檢討，結論可能係中介人角色會重大改變。嘩，咁咪即係叫經紀執笠？
李華華