精神病房殺聲四起<br>洪朝豐狂寫歌唱瘋子

精神病房殺聲四起
洪朝豐狂寫歌唱瘋子

洪朝豐昨日繼續在東區尤德夫人那打素醫院精神科急性男病房留醫,並親自寫了兩首名為《致瘋人館內諸瘋人》及《告別瘋子歌》的歌。瘋言瘋語的他更謂見鬼殺鬼,見神殺神,看來病情不輕。

洪朝豐昨日仍留醫東區尤德夫人那打素醫院精神科急性男病房,約有十多名記者想入病房與洪朝豐見面。醫院的保安比前日森嚴得多,除了有職員負責紀錄探訪者的姓名外,第一重病房內更有一名保安人員看守。而獲洪朝豐接見的記者進入第一道門後,先要登記身份證,再由職員帶同進入第二道門。職員要求記者放下所有隨身物品在接待處,只可帶紙筆內進,訪問內容如下:
洪:洪朝豐 記:記者 
洪(先歎一口大氣):我幫人幫到好攰,為人為到想死,籌錢嘅事我三月尾先算啦,林卓斌會長三月尾就職,三月尾我會整單國際勁嘢畀佢。
記:點勁呀?
洪:到時我會為佢籌錢,籌一億,都係唔講幾多,一千又好一千萬又好,盡心啦,反正好多地方要用錢,五十個分會都要用錢,我又要用錢。
記:你𠵱家唔搞籌款,咁正月十五搞乜呀?

赴泰國救白鮓

洪:你放心,我正月十五有嘢搞,搞日月星辰敍舊會,我唱歌表演,七點唱到十二點,喺「1516CAFE」搞。為咗大家開心啲,我由七點唱到一點,個名就叫做「洪朝豐七年之癢日月星辰敍舊」,呀!加埋音樂會啦,等人知我唱歌。我第二日七點就要上機啦。
記:你去邊呀?
洪(想了一想):我去泰國五日,你哋想跟就跟啦,我初十二(九日)就出院啦,總之十六就出發。
記:去邊呀?
洪:中南部,嗰度靈山聖水,地傑人靈。我第時都諗住喺度長住,我會準備房畀你哋,我間房好香㗎,因為我香囉,你哋(指記者)可以住我嗰度,不過你啲同事就冇法啦,要瞓門口,你叫佢唔好介意呀。大家玩得開開心心,唔使使錢㗎,我包,出入坐政府車,見鬼殺鬼見神殺神。我表弟喺嗰度做縣長,四十四歲,我會帶大家救白鮓。
記:點救呀?白鮓上水會死㗎喎!
洪(語氣囂張地):總之我會教你點救啦!我哋去海邊食嘢飲嘢聽歌飲紅酒,會去我爸爸八歲時游過嘅湖一齊游,我哋去遊蓮花山、畢架山,去睇潮州人起嘅廟,食連皮連核吞得嘅柑,好清甜㗎,好食到你想死。你哋自己出機票錢,但係要同我同機去,因為要採訪機內發生嘅事,今次指定航班係泰航,我有專人嘅公司幫你訂,最平㗎啦,早機去晚機返,玩足五日。你哋出機票錢,其他我畀(偷笑)!其實係泰國政府畀。你想寫稿就寫稿,有電腦有fax機

睇女記者上圍

記(記者是女性):唔得,我要帶泳衣。
洪:唔得,我要你帶泳褲,因為我要睇你上圍。(一邊講一邊笑)你重有乜嘢要問?
記:你前妻同個仔有冇探你?
洪(開始自問自答):我個仔有冇嚟探我?有!我老婆有冇嚟探我?有!我家姐有冇嚟探我?有!我老婆同個仔同家姐有冇幫我打工?有!我朋友有冇幫我打工?有!噚日喺瘋人院,唔係,係精神病房表演,一個鐘嘅miniconcert,我已經係精神科病院嘅表演嘉賓,因為啲人好鍾意聽我唱歌、彈結他、吹口琴。本來護士話DHL個口琴畀我,但係冇,我好失望。
洪:你(指記者)好準備啦,我寫咗一首告別歌:不堪回首不堪告別,教我如何不愛他,微風細雨,鼻鼾呼嚕,八重奏起,仙樂飄飄,冉冉長空,銀光四閃,八步天龍,威而不猛,瘋人是生人,瘋人是赤子,瘋子是天之驕子,君子為你為我為蒼生,消災解難,一人慘萬人福自享。瘋子呀瘋子,歌之舞之,手之足之,道之彼之愛之,到如今痛別離,願君個個養生,聖之好君再日見,紅塵碧海江湖再見,紅塵碧海江湖你我再見。呢首係《告別瘋子歌》。

病床全由膠製

洪:呢度啲人對我好好,我暈低有人幫我按摩,有人畀嘢我食,有人畀嘢我飲,我行過又叫我教佢催眠、功夫、唱歌,重要畀杯麵我食。佢哋問我可唔可以叫我一聲師傅,我答應佢哋我會成日返嚟探佢哋。你哋(指記者)要走嘞,聽日帶可樂嚟探我啦,唔好買罐裝,因為唔帶得入嚟,你日日帶生果上嚟佢哋會知㗎!
接着,洪朝豐便與記者握手、擁抱道別,於擁抱時更發出「啜」一聲,之後親自送記者離開房間。
記者所見,一間病房可容納十二人,所有病床都是膠製的,據知洪朝豐住在尾房最近窗口的病床。記者昨日致電曾治療洪朝豐,並證明他有「兩極性情緒錯亂症」的香港執業精神科醫生協會主席葉恩明,希望他就洪再次入院一事作回應,不過他透過秘書稱不會發表任何意見。
採訪、攝影:娛樂突發組

洪朝豐昨日親自作歌給院友,內容飄忽,實在難以捉摸。

不少傳媒昨日在東區尤德醫院精神病房外等候探望洪朝豐。

洪朝豐自與寶詠琴分手後,行為開始變得怪異。