本來重諗住噚日大市會繼續回軟，點知下午又反彈百幾點，尤其係國企紅籌，1日收復上周的失地，動力驚人，後市真係愈嚟愈難睇。
經紀黃話，國企紅籌走勢強勁，但並唔係只得佢哋獨領風騷，其實唔少工業股都見異動，IPE集團（929）悄悄創新高，隻股從事多種用途的精密金屬零件同埋硬盤驅動器零件，據聞近期生意好到不得了，今年定單已經滿晒，公司計劃增產，預期增加產能達60％。
IPE昨日升6.98％，收1.95元，成交股數302萬股，金額582萬元。
另外，以前賣聖誕樹，後尾轉型至電腦動畫的意馬國際（585），近排股價走勢叫人心猿意馬，昨日一度抽上多年高位3元，收市仍有2.55元，升27.5％，但成交股數只有250萬股，金額614萬元。
電腦動畫呢門生意將來有幾賺錢？小初唔識睇，但隻股中期業績重輸緊4000萬銀，家陣咁炒法未免有多少過火。
慕容小初